Ulaon Tardidi Pasahat Ulos Parompa: Acara Tardidi Dakdanak di Batam

"Ulaon adat Ulaon Tardidi Pasahat Ulos Parompa: Acara Tardidi Dakdanak di Batam"

Ulaon Tardidi pasahat ulos parompa on dideba luat jolo dipungka huria kebaktian singkat lengkap dohot renungan.

Alai dideba luat songon di Batam on, holan sada ende dungi tangiang pamuhai ma sian Huria. Dung sidung marsipanganon, ditutup Huria ma dohot tangiang panutup.

Dung sidung i, parhata ni suhut menggorahon undangan sada parsada jala mangaturhon parhundul na. Dimulai ma sian, Hula-hula, Tulang, Bona tulang, ollat ni on do anggo na digorahon.

Paranak: " Nunga mangarade hamu hula-hula nami?" 

Parboru (Hula-hula): "Nunga amangboru"

Paranak: "Ro ma hamu, raja nami!"

Parboru: Ro ma sauduran masuk tu jabu, sambil marsijalangan dohot suhut.

Songon i ma nang tu uduran ni tulang, digorahon ma asa masuk tu jabu.

Sambil masuk sasauduran marsijalangan ma menuju hundulan na be. Dung singkop sude uduran na martohonan di ulaon i, langsung ma di mulai parhata ni suhut:

Paranak: Mauliate ma di Amanta na martua Debata, nuang hupasahat hami ma tu hamu hula-hula nami, molo adong na naeng sipasahaton mu, pasahat hamu ma raja nami. Uduti ma tu Parboru2 di skenario ditoru on.

Ulaon tardidi adat batak toba

 Ulaon Tardidi dohot Pasahat Paroppa

Paranak1:     Loloan na marlas ni roha, dihita na mardongan tubu. Ra ianggo sian hita dang adong be sipaima on ate? Songon I ma nang dihamu hula-hula nami, tulang nami nantulang, tulang rorobot nami, beha raja nami, nga boi mulaan ta? Manang na adong dope sipaima on ta?

Parboru1:     Dang adong be, manguduti ma nasida. Langsung ma.

Paranak2:     Diari nauli, dibulan na denggan, apala disadari on, anak nami, pahoppu muna, bere muna si uncok. Na sogot nungga manjalo pandidion nabadia, marhite na poso ni Tuhan ta di Gareja. Mauliate ma tutu tu Tuhan ta parasi roha I disiala nungga gabe parjambar ibana di harajon ni Tuhan ta. Ala ni las ni roha nami, las ni rohanta hu patupa hami ulaon on rajanami. Alana naeng mulaan ta ma ulaon on, tar songon on ma konsep sian hami. Molo tung adong nanaeng sipasahaton tu pahuppu, bere muna, asa parjolo ma dipasahat raja I, hula-hula nami. Laos I ma annon songon dalan nami, pasahat hon sipasahaton nami nalaho pasangap hon hamu raja nami. Beha dirohamuna, raja nami, tiroi hamu hami. Horas ma jala gabe.

Parboru2:     Mauliate ma partingkian on naung dipasahat hamu tuhami, amangboru. Songon I ma dihamu pamoruon nami. Lumobi di hela, boru, suang songoni dipahoppu niba si Martunas Sinaga. Dison hupasahat hami upah-upah, ima dengke sitio-tio, asa sai tio ma antong panggabean, parhorasan dihamu. Dengke simudur-udur, asa sai marudur-udur ma mangalului angka ngolu siapari laho pature-pature pahoppu nami on. Sai saurma antong ibana laho jumujung goar na i. Imbur mangodang sahat saur matua tuppahan ni Tuhan ta pardenggan basa i. Botima.

                      On pe amang dihamu amang hela, boru, sai tangiang ma bahen hamu ondolan ni ulaon muna. Hipas hamu, jala didongani Tuhan nang di na pature-ture pahoppu nami on. Jala tu ibana pe antong dohon on na mi ma, Dangka ni hariara ma tanggo ni pangaitait on. Simbur ma ibana magodang, tongka panahitnahit on. …Emma tutu…Tubu ma tambisu di dolok ni sipoholon, sai anak na bisuk ma ibana, anak sipatujolo on. ….emma tutu… Naung sappulu sada,jumadi sampulu dua. Sai siboan sangap ma ibana jala siboan tua, botima. (loas diulos hon ma).

Paranak3:     Mauliate ma raja na mi, diangka na uli, na denggan, na pina sahat mu na tu ha mi,tarlumobi ma tu anak nami ima pahompu mu na. Saonari pe raja na mi, naeng ro ma ha mi pasahat on tudutudu ni sipanganon. Boha raja na mi, nunga boi hami ro?

Parboru3:     Na uli amang boru, nunga rade hami. Songon I ma di hamu haha parhundul na mi. Suang songon I dihula-hula na mi. Asa rap ma hita manjalo tudu tudu ni sipaganon sian parboruon ta.

Loloan:       (Alus ni hula hula parboru) Dos ma roha ta, naung rap manjalo ma hita disi. Botima.

Paranak4:     Di hamu hulahula nami, dison hu pasahat hami, tu hamu tudutudu ni sipanganon di pesta ni pahuppo mu na Si Martunas Sinaga. Siala naung manjalo pandidion na badia ibana marhite naposo ni Debata. Molo tung songon on pe na boi hupasahat hami, las ma roha mu. Songon hata ni situatua ma dohon on nami, Huta tanobato parasaran ni leang-leang. Horas ma dihamu na manjalo, horas dihami na mangalean, botima. …Emma tutu…

                      Dihamu amanta raja, inanta soripada, parmanganonta sistem prasmanan do. Dihamu hula-hula nami, ala laho marsipanganon ma hita, pinasahat ma tu raja I na mamilang tangiang mangan.

Parboru4:     Mauliate ma raja ni boru, inna roha na mi ala hamu na paradehon sian hamu ma na mamilang tangiang, dipangujungi na annon hami ma, botima amangboru.

Paranak5:     Na denggan, na uli raja na mi. on pe pinasahat ma tu amangta parhalado mambahen tangiang laho marsipangan on hita, botima. Martangiang, amen.

                      Pussu ni jabujabu, tu pussu ni simarlasuna. Songon I pe na tupa, sai Debata ma pasahat pasupasu na. …Emma tutu…. Marjomuk ma hita, laos marsipangan on.

Parboru5:     Di hamu amangboru nami, andorang so tapungka mangkatai, nangkin nunga dipasahat hamu tudutudu ni sipanganon tu hami, na manungkun ma hami tu hamu. Tar songon dia ma partording ni tudutudu ni sipanganon on, amang boru, songon I majolo sungkun-sungkun tu hamu, botima, mauliate.

Paranak6:     Olo ma tutu raja nami. Nunga tutu hu pasahat hami tudutudu ni sipanganon I, tu hamu, ninna roha nami, asa raja I ma na mangaturhon, botima raja nami, mauliate ma.

Parboru6:     Mauliate ma, amang boru. Ala naung diparsangapi hamu hami, jala tontong do hami sangap dibahen hamu. Alai ninna roha nami,na rodo hami, tu luat mu na on amang boru, asa didok roha nami, diluat mu na on ma ulaon hita, botima amangboru mauliate.

Paranak7:     Mauliate ma raja nami, andorang so diseat raut, jomolo ma diseat hata. Konsep ma sian hami, molo adong na hurang raja nami na boido hita marsipaunean, botima. (dipaboa ma konsep na dungi) Boha raja nami, nunga suman diroha ni raja i?

Parboru7:     Gabe ma jala horas. Nunga na uli I, amangboru. Ulahon hamu ma.

Paranak8:     Mauliate ma raja nami, dipatupa boru nami pe hombar naung ta hata I nangkin. Boru nami, asa patupa hamu dipudi hombar naung dihatai nangkin. Molo hurang antus asa marpanungkun hamu, mauliate ma.

Boru:           (paranak) Na uli raja nami, di hobasi hami pe.

Parboru8:     Di hamu amangboru na mi. Manghata I ma hita,

Paranak9:     Na uli raja nami.

Parboru9:     Asa serser inna mula ni tortor, sise mula ni hata. Gok hon sipaima on, joujou siadopon. Di gok hon dohot joujou tu hami hula-hula muna, nunga marna tampak hami. Bangko na do I, amang boru, molo so binoto, ba sise on ma antong. Jadi manise ma hami, nuaeng. Asa jolo dinangnang, asa dinungnung. Jolo pinangan, ninna asa sinungkun. Nunga bosur hita mangan indahan na las, sangan marloppan juhut, dohot minum aek sitiotio. Dohon on na mi ma, dia ma unok na, dia ma lakkat na, dia ma na nidok na, dia ma hata na, tangkas ma dipaboa hamu.

Paranak10:     I ma tutu,  raja nami. Taringot sipangan on, na so sadia, dohon on nami dope: godang sibutongbutong, otik sipir ni tondi. Tung songon on dope na boi tarpatupa hami, sai pamurnas ma I tu danging, saudara tu bohi, sipasindak panaili ma I, sipaneang holiholi, jala sipadomu tahi. Di sungkun sungkun ni raja I, alusan nami ma: panggabean parhorasan do raja nami.

Parboru10:     Mauliate ma di amanta Debata pardenggan basa I, si gagabe dohape angkup na horas. Asi ma roha ni amanta Debata, tumpak ma roha ni uhum asa dipasaorma tu hita sigabegabe, sihoras-horas. Asa dohon on nami ma; Bagot na marhalto ma niagatan di robean, horas ma hami, na mangat on, tu ganda ma dihamu na mangalehon. Antong amangboru, asa tangkas ma ujuan purba, tangkas ujuan dasip na, Asa tangkas hita ma duma, tangkas ma hita mamora. Tangkas ma paboa hamu, asa adong sibegeon ni sipareon, jala sipeop on ni roha.

Paranak11:     I ma tutu raja na mi. Taringot di sungkun-sungkun mu na i. Tangkas ma antong paboan, siangkup ni na uli, na denggan i. Raja na mi, ia anak nami, ima pahoppu/bere mu na, na sogot nunga manjalo, pandidion na badia, sian bagas joro ni Tuhan ta marhite na poso Na. Jala margoar ma ibana Sahat Martunas Sinaga, mas sai las si tutu antong roha nami, ala gabe partohap ibana di harajon ni Tuhan ta Jesus Kristus. Di siala las ni roha nami, hu patupa ha mi ma antong songon pesta  ni Si Sahat Martunas Sinaga  on. Jala on ma, dalan na mi mangido pasu-pasu sian amanta na martua Debata marhite tangiang  dohot hata pasupasu sian hamu sude na manghaholongi hami, tarlumobi di anak na mi on. Jadi na mangido tangiang ma hami, tu sude hamu dongan tubu, dongan sahuta, boru tarlumobi ma sian hulahula dohot sian tulang nami.

Parboru11:     Bah I do hape, antong mauliate ma nipasahat tu amanta na martua Debata. Hami pe sian hulahula dohot tulang  muna dohot antong marlas ni roha. Ai nunga gabe partohap hape pahoppu/bere na mi di harajon ni Debata. Nuaeng pe ni pasahat ma muse tu hamu amang boru, asa hamu ma na mangatur hon panghatai on. Botima.

Paranak12:     Di hita na mardongan tubu na marhaha angi, dongan sahuta, boru bere na mi, tarlumobi di hulahula dohot tulang nami. Hira songon on ma partording panghataia on diulaon ta sadari on. Parjolo ni pasahat ma tu hula-hula na mi, suang songon I, tulang nami nantulang dohot tulang rorobot, asa hamu marsiaturan raja na mi. Anggo hami na mardongan tubu, dohot boru bere, jala dongan sahuta, nami mangampu ma hami raja nami. Boha didok roha mu na raja na mi?

Parboru12:     Songon I ma amang boru, ala nunga dipasahat hami, hata gabe, hata pasu, partingkian on hu pasahat hami ma tu hamu. Botima.

Paranak13:     Mauliate ma raja na mi, didenggan ni pambahenan muna tu hami. Tarlumobi dianak nami I ma pahoppu/bere mu na. Asa aek marjullak jullak sian batu, ti nahu tu tabu tabu. Pasu gabe, pasu horas naung pinasahat ni tulang dohot hulahula, ampu on na mi ma I martonga jabu. Andorang so diampu hami raja nami, naeng ro ma hami mandapot on raja I pasahat pisopiso dohot pasituak na tonggi, boha raja na mi, nunga boi hami ro?

Parboru13:     Na uli amang boru, nunga mangarade hami. (dipasahat ma)

Paranak14:     Songon I ma nang dihita, ala naung sahat ma mangampu hata na uli, hata na denggan naung pinasahat ni hulahula dohot tulang ta, alai andorang mangampu hita tu hamu anggi ni ba suhut asa pasahat hamu pisopiso dohot pasituak na tonggi tu hulahula dohot tulang ta. Gomos jalang hamu hulahula dohot tulang ta.

Anggi:         (manang haha ni suhut) Mauliate ma tu amanta na martua Debata, na sai tong mangalehon ari na tiur dihita saluhut na. Boi denggan ulaon ta on mardalan sian na mamulai sahat tu tingki on. Sude ma I holan sian asi dohot holong ni rohana, tarlumobi ma dianggi niba ama Sahat Martunas Sinaga dohot inang boru galingging. Di hmu saluhut na haha anggi na mi, dongan sahuta tarlumobi ma hulahula dohot tulang nami. Mauliate ma nipasahat tu hamu di siala ha radeon ni roha mu mangolo I gokhon, jala dohot angka pambahenan na uli na denggan. Dang tarbalos hami I sude, ala I sai na dapot mu na doi sian amanta na martua Debata. Asa songon hata ni situatua dohon on nami: Marulos sibaganding didolok ni pangiringan, horas ma dihita na marhaha anggi marsipairingiringan. Tu hamu hulahula dohot tulang nami, mauliate disude hinauli nadenggan naung pinasahat mu nai tu hami, tarlumobi tu anank nami si Sahat Martunas Sinaga, ima pahoppu/bere mu na. Dipasahat hamu dengke simudur udur, dengke sitiotio, dengke sahat, dohot ulos siganjang rambu I ma ulos paroppa dohot angka ulos holong. Anggiat ma antong, asi ma roha ni Tuhan ta sahat ma hami tarlumobi ma tu pahoppu beremuna angka hata pasupasu marhite tangiang muna i. Molo tung mardomu sirang pe annon sian bagas on, tangiang nami dihamu hulahula dohot tulang nami. Sai didongani Tuhan ta ma hamu sahat tu bagas muna ganup marsadasada, angka hata na uli hata nadenggan, pasu gabe, pasu horas I, abim ma I antong diabingan na mi, tuat ma I diabara nami, jala hot ma I antong disimajujung nami. Asa songon hati ni situatua ma dohonon; Turtu ma ninna anduhur, tio ma ninna lote. Hata na uli na denggan naung pinasahat muna, sai unang ma muba unang mose. ….emma tutut… Jadi dianggi ni ba amani Sahat Martunas Sinaga, dohot inangboru galingging, sahat ma tu hamu pangampuon.

Hela:            Naung sappulu pitu jumadi sampulu ualu. Pasu gabe, pasu horas naung pina sahat mu, hu ampu hami mai antong martonga ni jabu. Turtu ma ninna anduhur, Tio ma ninna lote. Hata na uli, hata na denggan naung pinasahat muna, sai unang muba unang mose, botima.

Umpasa ulaon tardidi

1. Dakka ni bulu godang pinangaitaithon;
   Sai simbur magodang ma ibana mamboan goarna i, tongka panahitnahiton.
2. Habang Amba roba di atas ni Sibuntuon;
   Sai na Burju ma ibana marroha, jala jola sitiruon.
3. Dolok ni Janjimauli hatubuan ni Simarhorahora;
   Goarna na uli ma goar nai, donganna gabe jala mamora.
4. Sahat-sahat ni Solu sahat ma di rondang ni bulan;
   Leleng ma ibana mangolu mangusung goarna i diiiringi Tuhan.
5. Tu Hamu Natorasna on ma dohonon nami;
   Tubu ma tambisu di toru ni pinasa;
   Sai Martinodohon dope dakdanak na tardidi on angka anak na bisuk dohot angka boru nauli basa.
6. Horboni Sibuluan manjampal ni balian;
   Sai Dapot ma dihamu angka na niluluan jala sai tiur nang pansarian.
7. Sahat-sahat ni solu saahat tu bontean;Sahat ma hamu leleng mangolu jala sahat tu panggabean.

Lihat video penjelannya pasahat ulos parompa disini: 👇👇👇

https://www.youtube.com/watch?v=tEFb73LZlu8&ab